İnam Kərimov: "Məhdud təbii ehtiyatlarımıza əsas təzyiqlər kənd təsərrüfatındandır"

"2050-ci ilə qədər təxminən 10 milyard əhalini qida ilə təmin etmək hamımız üçün əsl sınaqdır".

"Report" xəbər verir ki, bunu kənd təsərrüfatı naziri İnam Kərimov" Gələcəyə baxış: Rəqəmsal kənd təsərrüfatına keçid” Beynəlxalq Konfransının Nazirlər üçün Dəyirmi Masasında çıxışı zamanı bildirib.

"Statistikaya müraciət etsək görərik ki, 2019-cu illə müqayisədə 2020-ci ildə qlobal kənd təsərrüfatı torpaqlarının sahəsi 3 % azalıb. Əhalinin artması ilə 2000-2019-cu illərdə adambaşına düşən əkin sahələri bütün regionlarda 17 % azalıb. Azalma tendensiyasına baxmayaraq, bu illərdə ümumi ilkin məhsul istehsalı 53 % artıb. Bu o deməkdir ki, bizim məhdud təbii ehtiyatlarımıza təzyiqlər əsasən kənd təsərrüfatının özündən qaynaqlanır.

Uzun illərdir ki, yeni yanaşmalara təşəbbüs göstərilir, aqro-ərzaq sistemlərindəki problemlərin aradan qaldırılması üçün yeni siyasət və strategiyalar işlənib hazırlanıb. Bununla belə, hazırda qloballaşma bizi rəqəmsal və innovativ həllərə sövq edir. Rəqəmsal texnologiyalar kənd təsərrüfatı üzərində çox böyük və dəyişdirici gücə malikdir. Kənd təsərrüfatı ilə yanaşı, bu həm də məşğulluq, ticarət, ətraf mühit və bazarlar üçün yeni bir fürsətdir", - deyə o, qeyd edib.