KOBİA daha 4 startapa şəhadətnamə verib

İqtisadiyyat Nazirliyi yanında Kiçik və Orta Biznesin İnkişafı Agentliyi (KOBİA) daha 4 sahibkarlıq subyektinə “Startap” şəhadətnaməsi verib.

Bu barədə “Report”a KOBİA-dan məlumat verilib.

Məlumata görə, şəhadətnamə alan bizneslər "Alqoritmik kredit texnologiyaları" MMC, "Delivery Azerbaijan" MMC, fərdi sahibkar Nəzər Allahverdiyev və "Əmir Texniki Xidmətlər” MMC-dir.

Sözügedən KOB subyektləri “Startap” şəhadətnaməsini aldıqları tarixdən innovasiya fəaliyyətindən əldə etdikləri gəlirlər üzrə mənfəət və gəlir vergisindən 3 il müddətinə azad olunur.

“Startap” şəhadətnaməsi almış startapların innovativ həlləri aqrar sahə üzrə istehsal qurğusu, maliyyə texnologiyaları, logistika xidməti və elektron ticarət kimi sahələri əhatə edir.

İndiyə qədər KOBİA 7 mikro və kiçik sahibkarlıq subyektinə “Startap” şəhadətnaməsi verilib. “Startap” şəhadətnaməsi almaq istəyən mikro və kiçik sahibkarlar ətraflı məlumatla və şəhadətnamə almış layihələr barədə KOBİA-nın www.smb.gov.az saytından müvafiq bölmədən tanış ola bilərlər.