KOBİA Latviya şirkətlərini işğaldan azad edilmiş ərazilərə dəvət edib

Azərbaycanın işğaldan azad edilmiş ərazilərində biznes təşəbbüsləri üçün böyük imkanlar var.

"Report" xəbər verir ki, bunu İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov Bakıda keçirilən "Azərbaycan-Latviya İnformasiya və Şəbəkə Görüşü"ndə bildirib.

Onun sözlərinə görə, KOBİA həmin ərazilərdə biznes layihələrini dəstəkləməyə və koordinasiya etməyə hazırdır.

Sədr vurğulayıb ki, işgüzar missiyalar və görüşlər, o cümlədən yüksək səviyyəli səfərlər zamanı keçirilən görüşlər ölkələrarası əməkdaşlıq üçün böyük potensialın olduğunu əyani şəkildə göstərir: "Bu qarşılıqlı əlaqələr bizə birgə layihələr üçün sahələri müəyyənləşdirməyə, daha güclü əlaqələr qurmağa və əvvəlki müzakirələri izləməyə kömək edir. Əvvəlki tədbirlərdə mən əlaqədar təşkilatlarla institusional əməkdaşlığı nə qədər yüksək qiymətləndirdiyimizi qeyd etdim və biz Latviya Ticarət və Sənaye Palatası ilə əlaqələrimizi gücləndirmək üçün fəal işləyirik. Bu, biznesin inkişafı alətləri haqqında məlumat və təcrübə mübadiləsini, biznes icmalarımız arasında birbaşa əlaqələr yaratmaq üçün birgə təşəbbüslərin həyata keçirilməsini əhatə edəcək. Mən buradakı biznes nümayəndələrini təqdim olunan imkanlardan maksimum yararlanmağa dəvət edirəm. KOBİA olaraq biz sahibkarlarımızın təşəbbüslərini dəstəkləməyə tam sadiqik. Bununla əlaqədar həm yerli, həm də xarici biznesə dəstək mexanizmlərimiz var".