Kristina Məmmədova: “Sahibkarlar banklardan faizsiz kredit istəyir”

“Ötən il biz 500 şirkət arasında sorğu keçirmişdik və bu sorğu nəticəsində bir çox maraqlı məsələlərlə qarşılaşdıq”.

“Report” xəbər verir ki, bu barədə Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) Baş katib əvəzi Kristina Məmmədova “Maliyyə Savadlılığı üzrə təlimçilərin İllik Yığıncağı 2020” tədbirində qeyd edib.

K.Məmmədovanın sözlərinə görə, sahibkarlar iki əsas məsələ ilə bağlı narahatlığını ifadə edib:

“Bu sorğu həm iri, həm orta, həm də kiçik sahibkarlar arasında keçirmişik. İki əsas məsələdə sahibkarlar narahatlıqlarını ifadə etdilər. Onların 70-80 %-i kadr çatışmazlığından narahat idi. Amma 90 %-ə qədər isə sahibkar maliyyə resurslarına əlçatanlığın olmamasından şikayətlənirdilər. Burada bir məsələ də var ki, sahibkarlar özləri kifayət qədər məlumatlı deyil. Onlar əsasən kreditləri düşünür. Digər maliyyə alətlər haqqında məlumatlı deyillər”.

ASK rəsmisi qeyd edib ki, sahibkarların bir çoxu maliyyə sisteminin yalnız mühasibatlıqdan ibarət olduğunu düşünürlər və bəziləri faizsiz kredit arzusundadır:

“Bir çoxu maliyyə mövzusunda danışanda fikirləşir ki, bir mühasib tutarıq və işimizi həll edərik. Biz də çox mühasiblər tanıyırıq ki, onlar mühasibatlıq ixtisasına malik deyillər. Bir çox hallarda isə ilin sonunda müəyyən problemlərlə üzləşirlər.

Biz bir müddət əvvəl banklarla bir tədbir keçirirdik və 10-15 illik təcrübəsi olan sahibkarlar bizə müraciət edirdi ki, banklar onlara 0 %-li kreditlər versin. Bu onu göstərir ki, onlar bank-maliyyə sistemi haqqında məlumatsızdırlar. Ona görə də maarifləndirmə işlərini davam etdirmək lazımdır”.