“Nobel Oil Services” Direktorlar Şurasını daha da gücləndirib

Enerji sənayesində geniş fəaliyyət göstərən “Nobel Oil Services” şirkətlər qrupunun Direktorlar Şurasına yeni üzvlər təyin edilib.

“Report”un məlumatlı mənbələrdən əldə etdiyi məlumata görə, qərara əsasən, James (Jim) Cowie (Ceyms (Cim) Koui) və Richard Duff (Riçard Daf) şirkətin Direktorlar Şurasının tərkibinə daxil olublar.

Enerji sektorunda 40 ildən çox zəngin təcrübəyə malik olan C.Koui 20 il ərzində BP şirkətində yüksək vəzifələrdə çalışıb. Son illərdə BP-nin Qlobal Quyu Əməliyyatları üzrə vitse-prezidenti, öncə isə Azərbaycan, Gürcüstan və Türkiyə regionu, eləcə də Böyük Britaniya və Norveç (Şimal Dənizində) quyu əməliyyatları üzrə vitse-prezidenti vəzifələrində işləyib.

R.Daf isə Böyük Britaniya, ABŞ və Yaxın Şərq ölkələrində enerji sənayesində 30 illik iş təcrübəsinə malikdir, həmçinin 17 il ərzində qlobal enerji sənayesində aparıcı mühəndislik şirkətləri sırasında olan Böyük Britaniyanın “Wood Group” şirkətində strateji layihələr üzrə prezident və digər vəzifələrdə çalışıb.

Direktorlar Şurasında əvvəlki illərdə təmsil olunaraq şirkətin fəaliyyətinə töhfə vermiş Eamon Gorman (Eymon Qorman) vəzifəsini tərk edib. Qeyd olunanlar istisna olmaqla, “Nobel Oil Services” şirkətlər qrupunun rəhbərliyinin tərkibi dəyişməz qalır.

"Nobel Oil Services" enerji sənayesində ixtisaslaşmış çoxşaxəli şirkətlər qrupudur və “NEQSOL Holding”in tərkibinə daxildir. “Nobel Oil Services” qazma, tikinti və layihə idarəetmə xidmətləri, avadanlıqlara texniki xidmət, təchizat və digər xidmətlər göstərir.