Azərbaycanın Norveçdəki səfiri Zaur Əhmədov Beynəlxalq Miqrasiya Təşkilatının (BMqT) Norveçdəki missiyasının başçısı Fumiko Naqano ilə COP29-u müzakirə edib.
“Report” xəbər verir ki, bu barədə təşkilatın Norveçdəki missiyasının mətbuat xidməti məlumat yayıb.
“[İsveçin paytaxtı] Stokholmda missiya başçımız Fumiko Naqano Azərbaycanın Norveçdəki səfiri Zaur Əhmədovu ziyarət edib. BMqT Könüllü Qayıdış və Reinteqrasiya Proqramı üzrə əməkdaşlıq və Bakıda keçiriləcək COP29 barədə səmərəli müzakirə aparılıb”, – missiyanın sosial şəbəkə hesabında bildirilib.
Xatırladaq ki, sentyabrın 24-də COP29 Sədrliyi və BMqT iqlim dəyişikliyi, sülh və insan mobilliyi arasındakı əlaqə mövzusunda Yüksək Səviyyəli Dəyirmi Masa təşkil etmişdilər.