Muxtar Babayev: "İnnovativ strategiyalar maliyyə və investisiyaları artırır"

İnnovativ strategiyalar biomüxtəlifliyin qorunması, bərpası və davamlı idarə olunması üçün maliyyə və investisiyaları artırır.

"Report" xəbər verir ki, bunu ekologiya və təbii sərvətlər naziri Muxtar Babayev COP29 çərçivəsində təşkil olunmuş "Təbiət-müsbət gələcəyə nail olmaq üçün İqlim Fəaliyyəti və Biomüxtəlifliyin Qorunması və Paris Sazişinin Məqsədlərinə uyğunlaşdırılması" Qlobal Liderlər Dəyirmi Masasında bildirib.

Onun sözlərinə görə, dövlət-özəl sektor tərəfdaşlıqları, təbiətə əsaslanan həllər 2030-cu il məqsədlərinə çatmaq üçün səylərin mərkəzində dayanır: "Bu məqsədlər 2030-cu ilə qədər planetin quru ərazisinin və okeanlarının azı 30 %-ni qorumağı, biomüxtəlifliyi qorumağı, iqlimə davamlılığı artırmağı və gələcək nəsillər üçün davamlı inkişafı təmin etməyi nəzərdə tutur. Təbiətə əsaslanan həllərə sərmayə qoymaqla iqtisadi imkanları artıra, davamlılığı gücləndirə və davamlı gələcəyin təməlini qoya bilərik".

Nazir qeyd edib ki, 3 məqsəd üzərində dayanmaq olar: "Birincisi, milli siyasətin uyğunlaşdırılması: 2030-cu il iqlim, təbiət və dayanıqlı inkişaf məqsədlərinə nail olmağımıza kömək etmək üçün milli siyasətlərdə iqlim, biomüxtəliflik təşəbbüslərini uyğunlaşdırmaq üçün strategiyaları araşdırmalıyıq. İkincisi, dövlət və özəl sektorlar arasında əməkdaşlığın gücləndirilməsi: Hökumət siyasətini və korporativ rəhbərliyi birləşdirərək, ekosistemləri qoruya və ədalətli nəticələri təmin edə bilərik. Nəhayət, mühafizə üçün maliyyə artımı: Özəl sektor təbiətdə öndə getməlidir".