"Qaçqınkom"un kommunal xidmətlərə görə borcunun olması məsələsinə aydınlıq gətirilib

Qaçqınların və Məcburi Köçkünlərin işləri üzrə Dövlət Komitəsinin ("Qaçqınkom") heç bir quruma kommunal xidmətlərə görə borcu yoxdur.

"Report" xəbər verir ki, bu barədə Dövlət Komitəsindən bildirilib.

Məlumata görə, məcburi köçkünlər kommunal xidmətlərə görə ödənişləri həmin xidmətləri göstərən qurumlara abunə müqaviləsi və müvafiq sayğac göstəriciləri əsasında ödəyirlər: "Kommunal və digər xidmətlər üzrə ödənişlərin əvəzi olaraq məcburi köçkünlərə dövlət büdcəsindən vahid aylıq müavinət verilir. Vahid aylıq müavinətdən təyinatı üzrə istifadə edilməsi ilə bağlı Dövlət Komitəsinin aidiyyəti şöbəsi, yerli nümayəndəliklər və Mənzil-Kommunal İstismar Sahələri tərəfindən məcburi köçkünlər arasında müntəzəm məlmatlandırma və təşviqat tədbirləri həyata keçirilir".

Qeyd edək ki, bəzi mətbuat orqanlarında "Qaçqınkom"un digər quruma bir milyon manatdan artıq borcu olması haqqında məlumat yayılıb.