ABŞ-da 2025-ci ilə qədər 480 yeni nüvə bombası istehsal ediləcək

ABŞ 2025-ci ilə qədər B61-12 modifikasiyasında 480 yeni taktiki nüvə bombası istehsal edəcək.

"Report" xarici mətbuata istinadən xəbər verir ki, bu barədə Amerika Alimlər Federasiyası məlumat yayıb.

Bu rəqəm Çin, Fransa, İngiltərə, Pakistan, Hindistan, Şimali Koreya və İsrailin nüvə silahlarının arsenalını üstələyir.

Bombalar ABŞ Hərbi Hava Qüvvələrinin və NATO üzvü olan digər ölkələrin F-35A, F-15E və F-16C/D, F/A-18 və Tornado taktiki qırıcı-bombardmançı təyyarələrini təchiz etmək üçün nəzərdə tutulub.

B61-12 nüvə bombaları B61-3, 4, 7 10 və 11 sursatlarının əvvəlki versiyalarının modifikasiyasıdır. Onlar B-2 Spirit strateji gizli bombardmançıları və B-21 Raider-i təchiz etmək üçün nəzərdə tutulub.

Müxtəlif hesablamalara görə, hazırda ABŞ-ın taktiki aviasiyada istifadə üçün 150-dək nüvə bombası var.

ABŞ-ın Milli Nüvə Təhlükəsizliyi İdarəsi bildirib ki, yeni nüvə bombalarının istehsalına noyabrın sonunda Texasda başlanılıb.