Britaniya hökuməti Ukraynaya növbəti humanitar yardımı təsdiqləyib

Böyük Britaniya Ukraynaya növbəti dəfə humanitar yardım ayırıb.

“Report” xəbər verir ki, bu barədə informasiya hökumətin saytında dərc olunub.

Bildirilib ki, humanitar yardımın məbləği 45 milyon funt-sterlinqdir. “Bu həm Ukraynadakı, həm də münaqişədən qaçan həssas təbəqələr, o cümlədən qadın və uşaqlar üçündür. Ukrayna daxilində 16 milyona yaxın insanın humanitar yardıma ehtiyacı olduğu bildirilir. Münaqişə başlayandan bəri Avropa ölkələrinə beş milyondan çox qaçqın gəlib və bu, İkinci Dünya müharibəsindən bəri ən sürətlə böyüyən qaçqın böhranına çevrilib”, - məlumatda göstərilib.

Həmçinin qeyd olunub ki, nəzərdə tutulan vəsaitin 15 milyon funt-sterlinqi BMT-nin Ukrayna Humanitar Fonduna (UHF), daha 15 milyon funt-sterlinqi isə hamilə qadınların və uşaqların psixi sağlamlığı üçün UNİCEF-ə ayrılacaq.