Ramin Məmmədov: Yəhudilər Azərbaycanın ictimai-siyasi həyatında fəaldırlar

Azərbaycanda yaşayan xalqlar arasında münasibətlər multikulturalizm, tolerantlıq, qarşılıqlı hörmət prinsipləri əsasında qurulub. Əsrlər boyu yəhudilər Azərbaycanda sülh və dostluq şəraitində yaşayıblar. Yəhudi icmaları cəmiyyətin ictimai-siyasi, sosial-iqtisadi və mədəni həyatında fəal iştirak edir.

"Report" xəbər verir ki, bunu Dini Qurumlarla İş üzrə Dövlət Komitəsinin sədri Ramin Məmmədov yəhudi icmalarının nümayəndələri ilə görüşündə deyib.

Görüşdə Bakı şəhəri Dağ Yəhudiləri dini icmasının sədri Milix Yevdayev, Avropa yəhudilərinin Bakı dini icmasının baş ravvini Şneor Seqal və Gürcü Yəhudilərinin Bakı dini icmasının sədri Zamir İsayev iştirak ediblər.

R. Məmmədov qeyd edib ki, çoxmillətli və çoxkonfessiyalı Azərbaycanda Ulu Öndər Heydər Əliyevin əsasını qoyduğu dövlət-din münasibətləri modeli dünyada ən uğurlu nümunələrdən biri kimi qəbul olunur. Ümummilli Liderin siyasətini uğurla davam etdirən Azərbaycan Prezidenti cənab İlham Əliyevin rəhbərliyi altında ölkəmizdə multikulturalizm və tolerantlıq ənənələrinin möhkəmləndirilməsi, dini etiqad azadlığının ən yüksək səviyyədə təmin olunmasına xidmət edən tədbirlər həyata keçirilir. R. Məmmədov vurğulayıb ki, Birinci vitse-prezident Mehriban xanım Əliyevanın multikultural dəyərlərin və mədəniyyətlərarası dialoqun təşviqinə xidmət edən təşəbbüsləri Azərbaycanda dövlət-din münasibətləri modelinin inkişafına mühüm töhfələr verib.

Bakı şəhəri Dağ Yəhudiləri dini icmasının sədri Milix Yevdayev Azərbaycan dövlətinin dini icmaya göstərdiyi qayğıya görə minnətdarlığını ifadə edib. Bildirib ki, Prezident İlham Əliyev regionda və dünya miqyasında qarşılıqlı hörmətin, sülh şəraitində birgəyaşayışın və səmərəli əməkdaşlığın güclənməsi üçün dəyərli işlər görür.

Avropa yəhudilərinin Bakı dini icmasının baş ravvini Şneor Seqal Prezident İlham Əliyevin siyasəti nəticəsində ölkədə bütün dini icmaların sərbəst fəaliyyəti üçün əlverişli şəraitin yaradıldığını qeyd edib. İcma sədri bildirib ki, dövlətin apardığı uğurlu siyasət nəticəsində Azərbaycan müxtəlif konfessiyaların, xalqların birgə yaşadığı, tolerantlığın yüksək səviyyədə qorunduğu ölkələrdən biri kimi tanınır.

Gürcü Yəhudilərinin Bakı dini icmasının sədri Zamir İsayev vurğulayıb ki, Azərbaycan multikulturalizminə, tolerantlığına, humanistliyinə, milli azlıqlara münasibətinə görə dünya ölkələrinə, xüsusilə də Avropa ölkələrinə ən yaxşı örnəkdir.

Dövlət Komitəsinin sədri həmçinin, Qafqazda ilk dəfə olaraq Azərbaycanda tikilən Yəhudi Dini-Mədəni Mərkəzində gedən işlərlə də tanış olub.