Bu il BTC kəməri ilə 19 min tondan çox Qazaxıstan nefti nəql edilib

Bu ilin birinci rübündə Qazaxıstanın “KazTransOil” şirkəti “Tengiz”yatağından hasil edilmiş və Aktau limanında ixrac üçün Bakı-Tbilisi-Ceyhan neft kəməri ilə 19 221 ton neft nəql edib.

Bu barədə “Report” Qazaxıstan mətbuatına istinadən xəbər verib.

Məlumata görə, 9 959 ton həcmində neftin ilk partiyası martın 23-də Aktau limanında “Prezident Heydər Əliyev” tankeri ilə yola salınıb. 9 262 ton kütlə həcmində olan neftin ikinci partiyası martın 27-də “Şuşa” tankeri ilə yola salınıb.

Xatırladaq ki, fevral ayının əvvəlində Türkiyədə baş verən zəlzələlərdən sonra “KazTransOil” şirkəti Ceyhan dəniz terminalında yükləmə əməliyyatlarının müvəqqəti dayandırılması ilə bağlı fors-major hallar barədə xəbərdarlıq alıb. Bununla əlaqədar olaraq, 2023-cü ilin fevralına planlaşdırılan 120 min ton həcmində Bakı-Tbilisi-Ceyhan neft kəməri ilə Aktau limanından Bakıya neft ixracının başlanması dayandırılıb.

Qeyd edək ki, 2022-ci ildə Qazaxıstan Prezidenti Kasım-Jomart Tokayev Transxəzər dəhlizi ilə neft nəqlinin artırılması barədə göstəriş verib. Bu göstərişə uyğun olaraq, “KazMunayQaz” və Azərbaycan Dövlət Neft Şirkəti arasında “Tengiz” yatağından hasil edilən, Bakı-Tbilisi-Ceyhan kəməri istiqamətində ildə 1,5 milyon ton neftin nəqlini nəzərdə tutan saziş imzalanıb.