İbrahim Əhmədov: "SOCAR Şərqi Avropaya "Rosneft”in yanacağının tədarükünə başlayır"

Azərbaycan Dövlət Neft Şirkəti (SOCAR) beynəlxalq neft-qaz ticarətində öz mövqelərini gücləndirmək niyyətindədir.

Bu barədə “Report”a SOCAR-ın ictimaiyyətlə əlaqələr və tədbirlərin təşkili idarəsinin rəis müavini İbrahim Əhmədov deyib.

O bildirib ki, bu istiqamətdə Rusiyanın “Rosneft” dövlət neft şirkətinin istehsal etdiyi neft məhsullarını Ukrayna, Polşa, Baltikyanı ölkələrə və digər Şərqi Avropa ölkələrinə tədarük etmək hüququnu təmin edən saziş imzalanıb: “Nəzərdə tutulan əməliyyatların həcmi və müddəti hazırda razılaşdırılmaqdadır.”

Xatırladaq ki, dünən SOCAR və “Rosneft” arasında “SOCAR Trading” şirkətinin Rusiya dövlət neft şirkətinin Ukraynaya neft məhsullarını ixracında operator qismində iştirak etməsi ilə bağlı "Report" məlumat vermişdi. Bu həftə “SOCAR Trading” şirkətinin rəhbərləri cari ilin aprel ayınadək Ukraynada "Rosneft"in yanacaq həcmlərinin bölüşdürülməsilə məşğul olmuş “Proton Energy Group S.A.” şirkətinin nümayəndələrilə danışıqlara başlayıblar. Mənbələrə görə, artıq bu ay tədarükə başlayacağını istisna etməyən yeni operator 100 min tondan artıq dizel yanacağı və 12 min ton maye qazı həcmindəki kvotası olduğunu bildirsə də, bazar iştirakçıları tədarükə iyun ayında başlamağın daha ağlabatan olduğunu düşünürlər.

Bu ilin I rübündə Azərbaycan təxminən 7,3 milyon ton neft (kondensatla birlikdə) ixrac edib ki, bunun da 6,9 milyon tonu konsorsium, 370 min tonu isə Azərbaycan SOCAR-ın payına düşüb. Neftin (kondensatla birlikdə) ixraca nəqli 2020-ci ilin müvafiq dövrünə nisbətən, təxminən 320 min ton, yəni 4 % azdır.