Koreya şirkətləri Azərbaycanda həyata keçirilən layihələrdə iştirakda maraqlıdır

Koreya şirkətləri Azərbaycanda həyata keçirilən layihələrdə iştirakda maraqlıdır.

“Report”un Energetika Nazirliyinə istinadən verdiyi məlumata görə, bunu Azərbaycanın energetika naziri Pərviz Şahbazov ilə görüşündə Koreyanın ölkəmizdəki fövqəladə və səlahiyyətli səfiri Li İn-Yonq bildirib.

Görüşdə iki ölkə arasında diplomatik əlaqələrin, iqtisadi-ticari münasibətlərin inkişafına toxunulub, energetika sahəsi üzrə əməkdaşlığın mövcud vəziyyəti və gələcək perspektivlərindən bəhs edilib.

Səfir Koreya şirkətlərinin energetika, o cümlədən bərpa olunan enerji mənbələrindən istifadə sahəsində yüksək texnoloji imkanlara və böyük təcrübəyə malik olduğunu və onların Azərbaycanda həyata keçirilən layihələrdə iştiraka maraqlarını bildirib.

Energetika naziri isə ötən il Koreyadan olan yüksək səviyyəli nümayəndə heyətlərinin Bakıya səfərləri zamanı keçirilmiş görüşlərin iki ölkə arasında əlaqələrin inkişafına təkan verdiyini və enerji sektorunda gələcək əməkdaşlıq üçün geniş imkanlar yaratdığını vurğulayıb.

Görüşdə qarşılıqlı maraq doğuran digər məsələlər barədə də fikir mübadiləsi aparılıb.