Şirvanda neft quyusunda püskürmə olub, tədbirlər görülür - YENİLƏNİB

Fövqəladə Hallar Nazirliyinin (FHN) "112" qaynar telefon xəttinə Şirvan şəhəri yaxınlığında neft quyusunda dəlmə işləri aparılan zaman qaz fontanı baş verməsi barədə məlumat daxil olub və dərhal əraziyə FHN-in Dövlət Yanğından Mühafizə Xidmətinin qüvvələri cəlb olunub, aidiyyəti qurumlar məlumatlandırılıb.

Bu barədə "Report"a FHN-dən bildirilib.

Təhlükəsizlik tədbirləri çərçivəsində hazırda yanğından mühafizə bölmələri ərazidə növbə çəkir, həmçinin fontanın qarşısının alınması üçün aidiyyəti qurumlar tərəfindən müvafiq tədbirlər görülür.

Şirvanda neft quyusunda qaz püskürüb.

“Report”un Aran bürosunun məlumatına görə, hadisə dünən saat 20:38-də “Şirvan OİL Company LTD” şirkətinin 1 saylı neft-qazçıxarma məntəqəsində baş verib.

Belə ki, 715 saylı neft quyusunda suqarışıq qaz fontan vurub.

Məlumat daxil olan kimi hadisə yerinə FHN-in Şirvan yanğından mühafizə hissəsinə məxsus 2 yanğınsöndürən maşın və canlı qüvvə cəlb edilib.

Qaz fontanının yanğına keçməməsi üçün lazımi tədbirlər görülür.

Qeyd edək ki, hadisə yerinə mütəxəssislərin gəlişi gözlənilir.