"SOCAR Türkiyə" karbon emissiyasının azaldılması ilə bağlı planlarını açıqlayıb

Azərbaycan Dövlət Neft Şirkətinin Türkiyədəki törəməsi olan "SOCAR Türkiyə" şirkətinin məqsədi 2050-ci ilə qədər 0 % karbon emissiyasına nail olmaqdır.

"Report"un Türkiyənin İzmir şəhərinə ezam edilmiş müxbirinin verdiyi məlumata görə, bu barədə "SOCAR Türkiyə" şirkətinin baş icraçı direktoru vəzifəsini müvəqqəti icra edən Elçin İbadov bu gün keçirilən mətbuat konfransında bildirib.

Onun sözlərinə görə, şirkətin hədəflərindən biri ilk olaraq 2035-ci ildə karbon emissiyası və havaya atılan tullantıları 40 %-dək azaltmaqdır.

E. İbadov bildirib ki, "SOCAR Türkiyə"nin əsas hədəfi isə 2050-ci ilədək bu göstəricilərin 0 %-ə çatdırmaqdır.

Xatırladaq ki, “SOCAR Türkiyə” 2006-cı ilin sonlarında təsis edilib. Şirkət Türkiyədə neft emalı və neft-kimya sahələrində layihələr icra etmək, təbii qaz ticarətini həyata keçirmək üçün yaradılıb. “SOCAR Türkiyə" qonşu ölkənin "Petkim Petrokimya Holding” - neft-kimya kompleksinin səhmlərinin nəzarət paketinə (51 %) malikdir.