Azərbaycan qılıncoynadanları Dünya Kubokunda çıxış ediblər

Azərbaycan təmsilçiləri Əlcəzairin Oran şəhərində qılıncoynatmanın sablya növü üzrə Dünya Kubokunda çıxış ediblər.

"Report" xəbər verir ki, Palina Kaspiaroviç, Səbinə Kərimova və Zərifə Hüseynovadan ibarət yığmamız komanda yarışında ən güclü səkkizliyə yüksəlmək üçün İtaliya millisi ilə qarşılaşıb.

Gərgin mübarizə şəraitində keçən görüşdə komandamız güclü rəqibinə 44:45 hesabı ilə uduzub.

Millimiz 9-16-cı yer uğrunda baş tutan duellerdə Əlcəzairi 45:19 hesabı ilə məğlub edib. 9-10-cu yer uğrunda reallaşan qarşılaşmada isə yığmamız İspaniya kollektivinə 32:45 hesabı ilə məğlub olub.

Palina Kaspiaroviç zədələndiyindən komandamız Bolqarıstanla 11-ci yer uğrunda görüşə çıxmayıb.

Sablyaçıların şəxsi yarışında Səbinə Kərimova və Zərifə Hüseynova qrup mərhələsini uğurla başa vursalar da, pley-offda mübarizəni dayandırıblar. Palina Kaspiaroviç isə ən güclü səkkizliyə yüksəlmək uğrunda keçirilən qarşılaşmada turnirin bürünc mükafatçısı, macar Katinka Battaniyə 7:15 hesabı ilə uduzub.