Azərbaycanın iki üzgüçüsü İslamiadadan qabaq Avropa çempionatında çıxış edəcək

Azərbaycanın üzgüçülük üzrə milli komandasının üzvləri iki mötəbər yarışda güclərini sınayacaqlar.

Bu barədə "Report"a məlumatı Azərbaycan Üzgüçülük Federasiyasının mətbuat xidmətindən veriblər.

Azərbaycan üzgüçüləri – Ramil Vəlizadə və Məryəm Şeyxəlizadəxangah milli komandanın baş məşqçisi Rəşad Əbdürəhmanovun rəhbərliyi altında İtaliyanın paytaxtı Romada avqustun 11-dən 17-dək təşkil olunacaq su idman növləri üzrə üzrə Avropa çempionatında güclərini sınayacaqlar.

Avqustun 11-də Ramil Vəlizadə 50 metr batterflay üsulunda, Məryəm Şeyxəlizadəxangah isə 100 metr krol üsulunda mübarizələrə qatılacaqlar. Bu yarışlardan dərhal sonra hər iki idmançı Türkiyənin Konya şəhərində keçirilən V İslam Oyunlarında milli komandaya qoşulacaqlar.

Qeyd edək ki, Azərbaycan milli komandası İslamiadaya geniş tərkibdə yollanıb. Hazırda məşqçi Rəşad Əliyevlə birgə digər üzgüçülər – Rəşad Alquliyev, Vəli İsrafilov, Əbdürrəhman Rüstəmov, Nihad Yusibov, Fatimə Alkərəmova, Selcan Əbdürəhmanlı, Aysel Səfərova, Ayan Kələntərova, İlahə Rəciyeva Konya şəhərindədirlər və yarışlara hazırlaşırlar. Üzgüçülük üzrə mübarizə avqustun 13-dən başlayacaq və Ramil Vəlizadə 100 metr batterflyay üsulunda gücünü sınamaqla debüt edəcək.