FIDE Karlsenlə Polqarı bütün zamanların ən yaxşı şahmatçıları kimi tanıyıb

Beynəlxalq Şahmat Federasiyası (FIDE) norveçli Maqnus Karlsen və macar Yudit Polqarı bütün zamanların ən yaxşı şahmatçıları kimi tanıyıb.

"Report" xəbər verir ki, bu barədə qurumun mətbuat xidməti məlumat yayıb.

Hər iki qrossmeyster Budapeştdə FIDE-nin yüzilliyinə həsr olunmuş qala gecədə mükafatlandırılıb.

2014-cü ildə karyerasını bitirən Yudit Polqar 1989-2015-ci illərdə FIDE-nin qadınlar arasında reytinq cədvəlinə başçılıq edib. Macarıstanın qadınlardan ibarət millisinin heyətində 1988 və 1990-cı illərdə Ümumdünya Şahmat Olimpiadasında qızıl, kişilərdən ibarət komandanın tərkibində isə iki dəfə gümüş medal qazanıb.

Maqnus Karlsen 2013-cü ildən 2023-cü ilə qədər dünya çempionu olub və bu titulu dörd dəfə uğurla müdafiə edib. O, 2023-cü ildə könüllü olaraq titulun beşinci müdafiəsindən imtina edib və şahmat tacına rusiyalı Yan Nepomnyaşini məğlub edən çinli Dinq Liren yiyələnib.