Kurban Berdıyev: "Qarabağ"la oyun həlledici olacaq"

"Konfrans Liqası və Qazaxıstan Kubokunu ayırmırıq. Bütün oyunlar bizim üçün vacibdir. Hər iki turnirdə qalib gəlmək istəyirik".

"Report" xəbər verir ki, bu fikirləri Qazaxıstanın "Kayrat" klubunun baş məşqçisi Kurban Berdıyev "Qarabağ"a qarşı keçirəcəkləri UEFA Konfrans Liqasının qrup mərhələsinin IV tur oyunundan əvvəl mətbuat konfransında deyib.

69 yaşlı mütəxəssisin sözlərin görə, sabahkı görüş komandasının pley-offa vəsiqə şansları baxımından həlledici olacaq: "Qarabağ"la Bakıdakı görüşün ilk yarısında olduğu kimi bütün 90 dəqiqəni oynasaq, müsbət nəticəyə nail ola biləcəyik. Komandamızın çıxışında müsbət dəyişikliklər görürəm. Lakin zonalar arasında tarazlığa nail olmalıyıq".

Türkmənistanlı baş məşqçi polşalı yarımmüdafiəçi Yatsek Quralskinin hələ tam formada olmadığını söyləyib. Onun fikrincə, Quralski bütün matç ərzində meydanda ola bilməz: "Oyunun gedişatına və onun bizə nə qədər faydalı olmasına baxacağıq".

Berdıyev Bakıya gəlməyən erməni cinah yarımmüdafiəçisi Kamo Ohanesyanın Almatıda meydana çıxma ehtimalına da toxunub: "Qarabağ"ın sol cinahı çox güclüdür. Bu, hücumun təhlükəli istiqamətidir. Həmin cinahda oynamaq bizim üçün ağır idi. Görək sabah Ohanesyan start heyətdə oynayacaqmı"?

Baş məşqçi Qazaxıstanda hələ "Qarabağ" səviyyəsində komanda ilə qarşılaşmadıqlarını da vurğulayıb: "Əlbəttə, Qazaxıstanda "Qarabağ" kimi komanda yoxdur. Rəqibimiz çox hazırlıqlıdır. Onlar müxtəlif situasiyalarda necə oynamağın gərəkdiyini bilir və anlayırlar".

Qeyd edək ki, noyabrın 4-də Almatı şəhərindəki "Ortalık" stadionunda keçiriləcək "Kayrat" - "Qarabağ" matçı Bakı vaxtı ilə saat 19:30-da başlayacaq.