"Mançester Yunayted"in hücumçusu irqçiliyə görə cəzalandırıldı

İngiltərə Futbol Assosiasiyası (FA) "Mançester Yunayted"in futbolçusu Edinson Kavanini cəzalandırıb.

"Report" xəbər verir ki, uruqvaylı hücumçu sosial şəbəkələrdə irqçi şərhinə görə 100 min funt sterlinq cərimələnib. O, eyni zamanda 3 oyunluq diskvalifikasiya edilib.

Kavani İngiltərə Premyer Liqasında X turun "Sautgempton"la matçında əzmkar qələbədən sonra sosial şəbəkədə istifadəçilərdən birindən təbriklərə cavab verərək, "Gracias negrito" ("Təşəkkür, qara") sözlərini yazıb. Uruqvaylı futbolçu paylaşımını 3 saat sonra silib, ancaq bu, FA-da diqqəti cəlb edib.

Beləliklə, hücumçu İngiltərə Premyer Liqasında "Aston Villa" və "Mançester Siti" ilə İngiltərə Liqa Kuboku, "Uotford"la isə İngiltərə Kuboku matçlarını buraxacaq.