Məşhur futbolçu klub prezidenti seçilib

Portuqaliya millisinin sabiq futbolçusu Ruy Koşta "Benfika" klubuna prezident seçilib.

"Report"un məlumatına görə, 49 yaşlı keçmiş yarımmüdafiəçi 84,48 faiz səs toplayıb.

Koşta Lissabon təmsilçisinə iyulda müvəqqəti prezident təyin olunmuşdu. O, fırıldaqçılıqda və "pul yumaq"da şübhəli bilinərək həbs olunmuş Luiş Felipe Vieyranı əvəzləmişdi.

Qeyd edək ki, Ruy Koşta "Benfika"nın yetirməsi sayılır. O, 1977 - 1990-cı illərdə gənclər komandasında, 1991 - 1994 və 2006 - 2008-ci illərdə əsas kollektivdə çıxış edib. Koşta yerli "Fafe" (1990-1991), həmçinin İtaliyanın "Fiorentina" (1994 - 2001) və "Milan" (2001 - 2006) klublarının da formasını geyinib. Portuqaliyalı oyunçu karyerasını başa vurduqdan sonra "Benfika"da idman direktoru kimi çalışmağa başlayıb.