Qara Qarayev: "Deyəcəyim hər söz komandaya ziyan verə bilər" - MÜSAHİBƏ

Azərbaycan millisinin və "Qarabağ" klubunun futbolçusu Qara Qarayevin "Report"a müsahibəsi

- Premyer Liqanın XVIII turunda "Qəbələ"ni 3:0 hesabı ilə məğlub etdiniz. Həmin görüş barədə nə deyə bilərsiniz?

- Hər matça qələbə qazanmaq üçün çıxırıq. Çünki çempionatın sonu yaxınlaşanda intriqa daha da kəskinləşir. Çempion olmaq istəyən komandalar xal itkisinə yol vermək istəmir, digərləri isə avrokuboklara vəsiqə əldə etməyi qarşılarına hədəf qoyublar. Ona görə hamı qarşılaşmalara xal və ya xallar qazanmaq üçün çıxır. "Qəbələ" də çempionatın ən maraqlı komandalarından biridir. Həm özləri oynayır, həm də oynamağa imkan verirlər. Bu il nəticə etibarilə yox, oynadığı oyun baxımından, "Qəbələ" bizim üçün sürpriz komandalardan biridir. Əsas hədəfimiz həmişəki kimi qalib gəlmək idi. "Qəbələ" üzərində inamlı qələbə bizi daha da ruhlandırdı, yolumuza daha yaxşı davam etmək üçün səbəblər verdi. Düşünürəm ki, maraqlı oyun alındı və layiqli qələbə qazandıq. Artıq növbəti oyunları düşünməliyik.

- Bu matçdan əvvəl "Sumqayıt"la qolsuz heç-heçə etdiniz və "Neftçi"yə 1:2 hesabı ilə uduzdunuz. Həmin oyunlardan sonra komandanızın qeyri-stabil çıxış etdiyinizi düşünənlər var idi. Bununla razısınızmı və sizcə, "Qarabağ" "Qəbələ" ilə qarşılaşmada özünə gələ bildimi?

- Mən elə düşünmürəm, çünki hər kəsin şəxsi fikri var. İstənilən şəxs bizim haqqımızda istədiyi fikirdə ola, istədiyi fikri yürüdə bilər. Amma biz komanda olaraq hər zaman doğru olanı etmişik. Futbolda bəzən belə nəticələr olur. "Neftçi" ilə görüş bizim üstünlüyümüz şəraitində keçdi, lakin məğlub olduq. "Sumqayıt"la oyunda da dəfələrlə qol epizodumuz oldu, amma istifadə edə bilmədik. Futboldur, bəzən komandalar yaxşı hazırlaşır, müdafiə olunur və səndən bir xal götürə bilir. Bizim üçün rahat olan amil odur ki, "Neftçi" ilə matça qədər və bu matçdan sonra da doğru olanı etməyə çalışmışıq. Həmişə "Qarabağ"ın strategiyası, məqsədi nə olubsa, bu plan üzrə çalışmışıq. Amma nəticə bəzən alınmır. Elə olur ki, yaxşı formada olan komanda da yaxşı nəticə qazana bilmir. Düşünürəm ki, belə fikirlər insanların şəxsi düşüncəsidir. Amma ən vacibi bizim doğru bildiklərimizi etməyimizdir. Son iki görüşdə tilsimə düşdüyümüzü də hesab etmirəm. Düşünmürəm ki, son görüşdəki qələbə ilə hansısa tilsimi qırmışıq. Məqsədimiz yalnız bütün oyunlara yaxşı hazırlaşmaq və hamısında qələbə qazanmaqdır. İki tur xal itirəndə komandamızda fövqəladə bir şey olmur, əksinə, hamının məsuliyyəti daha da artır. İşimizin ciddiliyini dərk edirik.

- Hər şey qaydasındadırsa, iki oyunda xal itirməyinizin səbəbi nə idi?

- İstər "Neftçi", istərsə də "Sumqayıt"la oyunda rəqiblərdən bütün komponentlərdə üstün idik. Komanda olaraq pis oynamamışdıq. Lakin "Neftçi" ilə görüşdə məğlubiyyətə səbəb 1-2 metr topa çatmamağımız idi. Futbolda belə şeylər olur: Nə qədər yaxşı futbol oynasan da, rəqib səndən xal ala bilir. Bu isə futbolu daha da maraqlı edir. Artıq güclü və ya zəif komanda yoxdur, kim həmin gün daha hazırlıqlıdırsa, o da nəticə qazana bilir. Sözsüz ki, "Neftçi"yə qarşı məğlubiyyətdən çox bu komanda ilə qalan intriqa mənim üçün önəmlidir. Ümid edirəm ki, bu intriqa hələ də qalacaq. Çempionatımızda hazırda "Neftçi" - "Qarabağ" matçı ən yaddaqalan derbi və duellərdən biridir. İstəmirəm ki, həmin qarşılaşmaya kölgə salaq və onun haqqında çox danışaq. Futboldur, "Neftçi" qələbə qazanıbsa, deməli, həmin gün onlar layiq idi.

- Kevin Medina həmin oyundakı hərəkətinə görə 4 oyunluq cəza aldı. "Qarabağ"ın futbolçuları həmişə intizamlı olmaları ilə seçiliblər. Həmin məsələ haqqında nə deyə bilərsiniz?

- Bu barədə baş məşqçimiz Qurban Qurbanova suallar verilib. O da deyib ki, bu məsələdən danışmayaq, artıq geridə qalıb. İndidən sonra deyəcəyim hər söz Medinaya, mənə və ya komanda yoldaşlarımdan digərlərinə ziyan verə bilər. Hər kəs lazımi nəticəni çıxarıb. Bu məsələyə qayıtmasaq, daha yaxşı olar.

- "Qarabağ" ardıcıl 7 mövsüm çempion olub. Bu mövsüm əsas rəqibiniz "Neftçi"nin axıradək sizinlə rəqabət apara biləcəyini, yoxsa yenə çempionluğu sona bir neçə tur qalmış həll edəcəyinizi düşünürsünüz?

- Çempionatda böyük güc fərqi ilə üstün olan komanda yoxdur. Fikir verirsinizsə, biz və "Neftçi" müxtəlif rəqiblərə qarşı görüşlərdə xal itiririk. Düşünürəm ki, Premyer Liqadakı gərginlik davam edəcək. Hələ indidən kiminsə daha üstün olduğunu demək düzgün olmaz. Bu barədə danışmaq tezdir. Hələ qarşıda oyunlar var.

- Növbəti turda "Zirə" ilə üz-üzə gələcəksiniz. Rəqib üçüncü sırada qərarlaşıb, baş məşqçi Rəşad Sadıqovu da yetərincə tanıyırsınız. Həmin qarşılaşmada hansı nəticə qeydə alına bilər?

- Çempionatın sürprizləri qabaqdadır. Kimin kimdən xal alacağı hələ bilinmir. Proqnoz vermək belə, çox çətindir. Rəşad Sadıqov haqqında yalnız xoş sözlər demək olar. Qurduğu komanda və oyunlardakı nəticələri göz qabağındadır, şərhə ehtiyac belə yoxdur. Məncə, "Zirə" gündən-günə daha yaxşı forma yığır. Bizim üçün qarşıdakı oyun çətin olacaq. Əlimizdən gələni edəcəyik ki, 3 xal əldə edək.

- "Qarabağ"dan ayrılan Donald Gerye haqqında da fikirlərinizi öyrənmək istəyərdik. Qış fasiləsində sizi çətin durumda qoymasını necə qarşıladınız?

- Belə şeylər haqqında danışmağı xoşlamıram. Çünki ən yaxşı izahı baş məşqçimiz Qurban Qurbanov vermişdi. Məncə, Donald bu hərəkəti etməməli idi: istər "Qarabağ"a, istərsə də oyunçulara qarşı. "Qarabağ" bundan artıq hörmətə layiqdir. Bilmirəm ki, onun haqqında nə deyim. Amma düşünürəm ki, bu kollektiv, azarkeşlər və komanda daha çox hörmətə və diqqətə layiqdir. Gerye və digər futbolçular buna çox ciddi diqqət yetirməlidirlər. Bu komandanın məsuliyyəti dərk edilməlidir. Həyatda belə şeylər olur: bəzən komandaya qarşı bu cür diqqətsizlik edəndə baş məşqçi digər alternativlər axtarır, futbolçu isə komandasını dəyişmək istəyir. Ona gələcək karyerasında uğurlar arzulayıram.