Bərdədə tapılan 15 yaşlı qızın meyitində xəsarət izləri aşkar edilib, cinayət işi açılıb - YENİLƏNİB

Bərdə rayonunun Cəyirli kəndində yarımtikilidə iki gün əvvəl itkin düşmüş həmin kəndin sakini, 2009-cu il təvəllüdlü Sevinc Abbaslının meyitinin aşkar edilməsi ilə bağlı cinayət işi başlanıb.

Bu barədə "Report"a Bərdə Rayon prokurorluğundan məlumat verilib.

Bildirilib ki, prokurorluq və polis əməkdaşları tərəfindən prokuror kriminalist və məhkəmə-tibb ekspertinin iştirakı ilə hadisə yerinə, meyitə baxış keçirilib, müvafiq ekspertizalar təyin edilib, o cümlədən digər zəruri prosessual hərəkətlər yerinə yetirilib.

"Meyitin xarici müayinəsi zamanı üzərində müxtəlif xəsarət izləri aşkar edilib. İlkin araşdırma zamanı zərərçəkmişin qəsdən öldürülməsinə əsaslı şübhələr müəyyən edildiyindən rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Hazırda cinayəti törətmiş şəxs və ya şəxslərin müəyyən olunaraq məsuliyyətə cəlb olunması istiqamətində istintaq-əməliyyat tədbirləri davam etdirilir", - məlumatda qeyd olunub.

Bərdə rayonunda iki gün əvvəl itkin düşən 2009-cu il təvəllüdlü Sevinc Rəşad qızı Abbaslının meyiti aşkar edilib.

“Report”un Qarabağ bürosunun məlumatına görə, hadisə rayonun Cəyirli kəndində qeydə alınıb.

Bildirilib ki, qızın meyitinin qonşu həyətdə basdırıldığı müəyyən olunub.

Meyit aidiyyəti üzrə təhvil verilib.

Hazırda faktla bağlı Bərdə rayon Prokurorluğunda araşdırma aparılır.