Bakı 16° C
https://static.report.az/photo/8447b358-ba13-341f-b332-f51c5cfe2ebb.jpg
Bu gün Bakı Ağır Cinayətlər Məhkəməsində Azərbaycan ərazisində terror-təxribat törədən erməni silahlı dəstələrinin üzvləri - Avakyan Qraç Arzumanoviç, Serobyan Geğam Samveloviç, Baqasyan Armen Yegizari, Qasparyan Qor Vaqramini, Sefilyan Kamo Karenoviç, Hakobyan Volodiya Vaçaqani, Asetryan Gevorq Norairoviç, Yenqoyan Sisak Qrişai, Petrosyan Albert Kamoyeviç, Sedrakyan Romik Misakini, Minasyan Aram Qarnikoviç, Minosyan Mkrtıç Simonoviç, Matesyan Edqar Vaçaqanoviç və Karapetyan Yuri Tiqranoviçin cinayət işi üzrə məhkəmə iclası keçirilib.
"Report"un xəbərinə görə, hakim Əfqan Hacıyevin sədrliyi ilə keçirilən prosesdə təqsirləndirilən A.Petrosyan dindirilib.
O bildirib ki, Azərbaycan Silahlı Qüvvələri tərəfindən saxlanıldıqdan sonra ona və digərlərinə heç bir təzyiq göstərilməyib:
“Saxlanılan zaman bizə insani münasibət göstərildi. Onlar su və siqaret verdilər. Silah-sursatlarımızı Azərbaycan Silahlı Qüvvələrinin hərbi qulluqçularına təhvil verdik”.
Daha sonra məhkəmədə digər təqsirləndirilən Q.Qasparyan ifadə verib. O, dindirilən zaman deyib ki, ötən ilin noyabr ayında Gümrüdə yerləşən hərbi komissarlığa çağırılıb: “Laçına getdik, sonra Hadrut istiqamətində dağda məskunlaşdıq. Biz dağdan aşağı enəndə Azərbaycan Silahlı Qüvvələri tərəfindən saxlanıldıq, silahlarımızı da onlara təhvil verərək təslim olduq".
Prokurorun suallarını cavablandıran Q.Qasparyan söyləyib ki, Laçın istiqamətində Rusiya sülhməramlılarının yanından silahları ilə birlikdə keçiblər.
Məhkəmədə onun istintaqa verdiyi ifadəsi elan olunub. O, istintaqda dindirilən zaman deyib ki, məqsədləri olduqları ərazilərə Azərbaycan tərəfindən kimsə gəlsə, onlara silahlı müqavimət göstərmək idi.
Daha sonra prosesdə A.Minasyan, K.Sefilyan, A.Baqasyan və S.Yenqoyan da dindirilib. Onlar da digər təqsirləndirilən şəxslər kimi eyniməzmunlu ifadə veriblər.
Təqsirləndirilən şəxslərin hər birinin istintaqa verdikləri ifadə ilə məhkəmədəki ifadələr arasında ziddiyyət yaranıb. Onların istintaqa verdikləri ifadələr elan olunub.
Həmin şəxslər istintaqda bildiriblər ki, Azərbaycan Silahlı Qüvvələrinin hərbiçələri onların olduğu əraziyə yaxınlaşacaqları təqdirdə silahlı müqavimət göstərmək əmri alıblar.
Hakim bildirib ki, cinayət işi üzrə 2 nəfər şahid var: “Onlar da növbəti məhkəmə iclasına dəvət olunaraq dindiriləcək".
Məhkəmənin növbəti prosesi iyulun 2-nə təyin edilib.
Xatırladaq ki, 10 noyabr 2020-ci ildə tarixdə Azərbaycan, Rusiya və Ermənistan arasında imzalanmış üçtərəfli bəyanatla atəşkəsin elan olunmasından sonra Azərbaycan Respublikasının ərazisinə qanunsuz olaraq gizli yollarla keçib Xocavənd rayonunun Hadrut qəsəbəsinin şimal-qərb hissəsində meşəlik ərazidə mövqe tutaraq hərbi qulluqçularımıza və mülki şəxslərə qarşı terror-təxribat və digər cinayət əməlləri törədən erməni silahlı dəstələrinin Dövlət Təhlükəsizliyi Xidməti (DTX) tərəfindən 13 dekabr 2020-ci il tarixdə keçirilmiş anti-terror əməliyyatı nəticəsində tərksilah edilmiş üzvləri barəsində DTX-nin İstintaq Baş idarəsində başlanmış cinayət işi üzrə ibtidai istintaq yekunlaşıb.
Aparılan istintaqla müəyyən edilib ki, Ermənistan Respublikasının vətəndaşlarından ibarət bir qrup şəxs qanunsuz şəkildə odlu silah, onun komplekt hissələrini, döyüş sursatı, partlayıcı maddələr və qurğular əldə edərək qanunvericiliklə nəzərdə tutulmayan silahlı birləşmələr yaradıblar. Həmin birləşmələrin üzvləri 26-27 noyabr 2020-ci il tarixdə Azərbaycan Respublikasının dövlət sərhədini qanunsuz olaraq mütəşəkkil dəstə halında keçməklə Xocavənd rayonunun Hadrut qəsəbəsinin şimal-qərb hissəsində meşəlik və digər ərazilərində döyüş mövqeləri tutaraq 13 dekabr 2020-ci il tarixədək olan müddət ərzində ölkə ərazisində yerləşən müəssisə, idarə, təşkilatlara, habelə ayrı-ayrı şəxslərə silahlı basqınlar etmiş, ictimai təhlükəsizliyi pozmaq, əhali arasında vahimə yaratmaq, Azərbaycan Respublikasının dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması və başqa ictimai təhlükəli nəticələrin baş verməsi təhlükəsi yaradan partlayış, yanğın və digər terror əməlləri törədiblər.
Sadalanan faktlarla bağlı qanunsuz silahlı birləşmənin üzvləri Avakyan Qraç Arzumanoviç, Serobyan Geğam Samveloviç və digərlərinin, ümumilikdə 14 təqsirləndirilən şəxsin Azərbaycan Respublikası Cinayət Məcəlləsinin 214.2.1, 214.2.3-cü (terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən odlu silahdan və silah qismində istifadə olunan predmetlərdən istifadə etməklə törədildikdə), 228.3-cü (mütəşəkkil dəstə tərəfindən qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə), 279.2-ci (qanunvericiliklə nəzərdə tutulmayan silahlı birləşmələrin və ya qrupların tərkibində müəssisələrə, idarələrə, təşkilatlara və ya ayrı-ayrı şəxslərə basqın etmə) və 318.2-ci (qabaqcadan əlbir olan bir qrup şəxs və ya mütəşəkkil dəstə tərəfindən Azərbaycan Respublikasının dövlət sərhədini qanunsuz olaraq keçmə) maddələri ilə ittiham olunmalarına dair cinayət işinin istintaqı yekunlaşdırılaraq Azərbaycan Respublikası Baş Prokurorunun müavini tərəfindən təsdiq edilmiş ittiham aktı ilə birlikdə baxılması üçün məhkəməyə göndərilib.
