İnnovasiyalar Agentliyindən “ağıllı” texnologiyaları olan şirkətə dəstək

Nəqliyyat, Rabitə və Yüksək Texnologiyalar Nazirliyi yanında İnnovasiyalar Agentliyi yüksək texnologiyalar sahəsində mövcud olan texnoloji yenilikləri tətbiq edən, proqram təminatları hazırlayan və “ağıllı” texnologiyalar üzərində çalışan “ATG” (Advanced Technologies Group) MMC-yə dəstək verib.

Bu barədə "Report"a Agentlikdən məlumat verilib.

Məlumatda deyilir ki, hazırda şirkət bir sıra layihələri həyata keçirir. Şirkətin Araşdırma və Texniki bölüm rəhbəri Nicat Abdulla raket texnologiyaları üzrə xaricdə ali təhsil almış mütəxəssisdir və şirkətin hazırda üzərində çalışdığı əsas layihələri ilə bağlı mətbuata müsahibə verərək bəzi texniki xüsusiyyətlərini açıqlayıb.

Bu layihələrdən biri lidar texnologiyasına əsaslanır və şəhərlərin bərpasında, yolların salınmasında, eyni zamanda abidələrin, binaların təmir və bərpasında geniş imkanlar yaradır. “ATG” şirkəti layihəni partnyor olduğu iki Azərbaycan şirkəti – “Project Terra” və “Olimp UAV” ilə birgə həyata keçirir.

Qeyd edək ki, işğaldan azad olunmuş ərazilərdə aparılan işlərdə bu texnologiya çox faydalı ola və bir çox işləri daha qısa müddətdə görmək imkanını təqdim edə bilər. Lidar texnologiyası radar texnologiyasına bənzəyir, lakin ondan fərqli olaraq burada radio dalğaları yerinə işıq, yəni lazer zərbələri istifadə edilir.

Lidar – hədəfi lazer işığı ilə işıqlandırdıqda yaranan əksetməni hesablayaraq məsafələri ölçmə metodudur. Bu texnologiya, həmçinin obyektlərin formasını, ölçüsünü onların arasındakı məsafə və boşluqları dəqiqliklə müəyyən etmək imkanını yaradır. Lidar texnologiyası həm yerdən, həm də havadan rəqəmsal məlumatın əldə edilməsi üçün istifadə edilir. “ATG” şirkəti hər iki xidməti göstərən peşəkar heyətə sahibdir. Havadan lidar xidmətlərinin təmin edilməsi uçuş sertifikatı olan dron və peşəkar pilotlar tərəfindən həyata keçirilir.

Lidar texnologiyasının əsas üstünlükləri:

- Yüksək dəqiqlik və rəqəmsal məlumat bazasının əldə edilməsi;

- Vaxta qənaət;

- 3D formatında real obyektin tam əksinin yaradılması;

- Əldə edilən lidar məlumatı əsasında planın hazırlanması və əlavə olaraq lazım olan məsafə, yerləşmə, interval və digər ölçülərin dərhal əldə edilməsi;

- Layihənin davamiyyətinin vizual hesabatı imkanı;

- Yolların salınması, körpü və bina tikintisi, həmçinin bərpa işlərində sərf ediləcək materialın əvvəlcədən hesablana bilməsi.

Daha bir layihə “AZUR” adı ilə həyata keçirilib və yaxın aylarda təqdimatı nəzərdə tutulur. Bu layihə “ağıllı” sistemlər sırasına aid edilir və Ukraynanın “UkrSpec Systems” şirkəti ilə birgə işlənilib. Bəzi texniki işlərin tamamlanması prosesi davam etdiyindən layihənin məxfiliyi qorunmaqdadır, lakin “AZUR” Azərbaycanda yüksək texnologiyalar sahəsində olduqca müsbət qarşılanacaq və qısa zamanda mətbuat üçün geniş açıqlamalar təqdim ediləcək.

Proqram təminatı sahəsində “ATG” şirkəti müasir zaman üçün logistika sahəsində bir çox proseslərin avtomatlaşdırılması, sadələşməsi və xərclərin azaldılmasına köməklik edəcək “LOMS” adlı məhsulu ərsəyə gətirib. Layihənin əsasən neft və qaz, logistika və nəqliyyat sahələrində geniş istifadə edilməsi nəzrədə tutulur.

Məhsulun potensialı nəzərə alınaraq yüksək texnologiyalar sahəsində ixrac imkanlarının olduqca böyük olduğu ehtimal edilir.

Yaxın zamanda layihələr haqqında daha geniş məlumatlar açıqlanacaq və İnnovasiya Agentliyi ilə birgə layihələrin reallaşdırılması yönündə müvafiq işlər həyata keçiriləcək.