Bakının Qaraçuxur qəsəbəsinin Nizami İsmayılov küçəsi təmir edilib

Azərbaycan Avtomobil Yolları Dövlət Agentliyi (AAYDA) 2021-ci ilin İnvestisiya Proqramına uyğun olaraq, Bakının Suraxanı rayonunun 2 qəsəbəsi və 3 yaşayış massivi üzrə ümumi uzunluğu 18,5 km olan qəsəbədaxili küçə və yolda təmir-tikinti işlərini davam etdirir.

Bu barədə "Report"a qurumdan bildirilib.

Məlumata görə, bu çərçivədə sözügedən rayonun Qaraçuxur qəsəbəsində 1 km uzunluğa malik Nizami İsmayılov küçəsində təmir-tikinti işləri yüksək keyfiyyətlə icra olunaraq yekunlaşdırılıb.

Küçə uzun müddət təmir olunmadan istismar olunduğundan gediş-gəlişdə problemlərə səbəb olurdu, hərəkətin rahat və təhlükəsizliyini təmin etmirdi. Məhz bu səbəbdən aparılan yenidənqurma işləri çərçivəsində küçə boyu köhnə asfalt-beton örtüyünün üst qatı frezlənərək kənara daşınıb, zəruri olan yerlərdə yararsız qrunt qazılaraq çıxarılıb, əks-dolğu işlər icra olunub. Daha sonra küçəyə yeni asfalt-beton örtüyünün döşənməsi işləri aparılıb.

Təmir zamanı küçə boyu zəruri olan yerlərdə piyada səkiləri bərpa olunub, səkilərin hərəkət hissəsi asfaltlanıb, təmir işlərinin aparıldığı ərazidə köhnə səki daşları yenisi ilə əvəz edilib.

Bu işlərə paralel olaraq küçə boyu səth sularının normal kənarlaşdırılması üçün nəzərdə tutulmuş yağış-kanalizasiya sistemi də bərpa olunaraq işlək vəziyyətə gətirilib, yeraltı kommunikasiya xətlərinə yeni baxış qapaqları qoyulub.

Layihənin sonuncu mərhələsində avtonəqliyyat vasitələrinin normal hərəkətinin təmin edilməsi məqsədi ilə, zəruri yerlərdə yol nişanları və məlumatverici lövhələr quraşdırılıb, yolcızgi və yolgöstərici xətlər, həmçinin piyada zolaqları çəkilməklə sözügedən ərazidə yeni və müasir yol infratsrukturu yaradılaraq vətəndaşların istifadəsinə verilib.

Prezident İlham Əliyevin Sərəncam və tapşırıqları əsasında AAYDA 2019-2020-ci illərdə Suraxanı rayonunun qəsəbələrini əhatə edən ümumi uzunluğu 50 km-ə yaxın qəsəbədaxili küçə və yollarının təmiri işlərini icra edib.

Vətəndaşların rahat gediş-gəlişinin təmin olunması istiqamətində növbəti ilin investisiya proqramı çərçivəsində Yasamal rayonu ərazisində təmirə ehtiyacı olan digər küçə və yollarda da təmir işlərinin aparılması nəzərdə tutulur.