Keşiş: "Azərbaycan tarixi və mədəniyyət abidələrini qoruyur"

"Azərbaycan bütün dünyanın tarixi və mədəniyyət abidələrinə həssas münasibətin nümunəsini təqdim edir".

“Report” xəbər verir ki, bu barədə Rusiyanın “Nezavisimaya qazeta” nəşrinə müsahibəsində İtaliyanın Merano şəhərindəki Müqəddəs Nikola ortodoks kilsəsinin rəhbəri iqumen Aleksey Nikonorov bildirib.

“Ötən 27 il ərzində Azərbaycan dövləti qarşısında duran mürəkkəb siyasi, iqtisadi və s. problemlərə baxmayaraq tarixi abidələrin səriştəli, beynəlxalq ekspertləri də cəlb etmək şərti ilə səliqəli bərpasına böyük diqqət yetirib. Bu, nəinki qədim şəhərlərə, qalalara, istehkamlara, xan saraylarına, məscidlərə, həm də xristian kilsələrinə, yəhudi sinaqoqlara da aiddir”, – ruhani deyib.

O, Birinci vitse-prezident Mehriban Əliyevanın UNESCO sülhməramlı səfiri olduğunu, rəhbərlik etdiyi Heydər Əliyev Fondu tərəfindən Romada antik çağına aid məşhur Müqəddəs Pyer və Marselin katakomblarının bərpa edildiyini, hazırda da Müqəddəs Sebastian kilsəsində bərpa işlərinin aparıldığını xatırladıb: “İtalyan jurnalistlər müsəlman Azərbaycandakı fond nə əcəb xristian mirasa aid abidələrin bərpasına pul ayırır sualı verdikdə Azərbaycanın birinci xanımı deyib ki, Azərbaycan Avropa və Asiya, Şərqlə Qərbin kəsişdiyi bölgədə yerləşdiyindən son dərəcədə rəngarəng ölkədir, buradakı xalqlar dostluq və qardaşlıq telləri ilə bir-birinə bağlıdır, bir çox dinlərin olması ölkənin böyük zənginliyidir. Qarabağın mədəni irsini qoruya biləcəyinə şübhə edənlər qoy Azərbaycana gəlib, bu ölkənin şəhərlərini, kəndlərini gəzsinlər, onda bütün şübhələrinə son qoyular”.

Qarabağda alban kilsə və məbədlərin erməniləşdirilməsi hallarına münasibət bildirən iqumen A.Nikonorov bildirib ki, müasir azərbaycanlılar bu regionda min illər ərzində təşəkkül tapmış xalqların varisləridir, tədricən fars və türk ünsürlərilə qaynayıb-qarışıblar, Qafqaz Albaniyası və başqa qədim dövlətlərin qanuni davamçıları, o cümlədən bu günlərə çatan mədəni və dini abidələrin də varisləridir.

“Hələ 428-ci ildə Ermənistan dövləti süquta uğrayaraq Sasani dövlətinin mərzbanlığına çevrildiyindən sonrakı yüz illər ərzində ara-sıra yaranan müstəqil erməni dövlətlərinin Qarabağa dəxli olmayıb. Ona görə də həmin vaxtlar bölgədə yaradılan abidələr ermənilərinki kimi qələmə verilə bilməz”, – ruhani diqqətə çatdırıb.

O, ərəb axınları başlayandan sonra alban dini abidələrin bərpası zamanı müəyyən erməniləşdirmə hallarının mümkün olduğunu vurğulayıb: “Lakin bu, Qafqaz Albaniyası dini və mədəni abidələrini erməni irsinə aid etmək üçün əsas ola bilməz”.

Qeyd edək ki, A.Nikonorov 2004-cü ildə Moskvada “Qafqaz Almaniyasında xristianlıq” mövzusunda disertasiya işini müdafiə edib.