Qırğızıstan parlamentinin sədri: "Heydər Əliyevin xalqı üçün danılmaz böyük xidmətləri olub"

“Ümummilli Lider Heydər Əliyevin xalqı üçün danılmaz böyük xidmətləri olub”.

“Report” xəbər verir ki, bunu Qırğızıstan parlamentinin (Joqorku Keneş) sədri Nurlanbek Şakiyev Milli Məclisin mayın 16-da Ulu Öndər Heydər Əliyevin anadan olmasının 100 illik yubileyi münasibətilə keçirdiyi xüsusi iclasda çıxışı zamanı deyib.

Onun sözlərinə görə, Heydər Əliyev bir çox çətinlikləri dəf edərək Azərbaycan dövlətinin müstəqilik tarixinin əsasını qoyub və böyük uğurlar qazanıb: “Azərbaycan iqtisadiyyatının güclənməsi də məhz onun adı ilə bağlıdır. Yüksək peşəkarlığı ilə Azərbaycan dövlətinin daha çox inkişaf etməsinə zəmin yaradıb. Heydər Əliyev bütün xidmətləri nəticəsində böyük şəxsiyyət kimi xalqın yaddaşında əbədi yaşayacaq”.

N.Şakiyev bildirib ki, Azərbaycanda əmin-amanlığın qorunub saxlanılmasında da onun böyük xidmətləri olub: “Heydər Əliyev tək müstəqil Azərbaycanın deyil, eləcə də keçmiş Sovet İttifaqında böyük iz qoyan siyasi xadim olub”.