İtaliyalı deputatdan işğalçıların Qarabağdan çıxarılması ilə bağlı çağırış

“İtaliya Azərbaycanın ərazi bütövlüyünü birmənalı olaraq dəstəkləyir”.

Bunu “Report”un Avropa bürosuna açıqlamasında İtaliya Senatının (parlament) Xarici əlaqələr daimi komissiyasının sədri, senator Vito Petroçelli bildirib.

O təəssüfünü bildirib ki, uzun illərdir bu münaqişənin həlli ləngiyir, XXI əsrdə sivil insanların həyatı, eləcə də region üçün potensial təhlükə mənbəyinə çevrilib:

“Bununla bağlı beynəlxalq hüququn tələbləri var və hələ də yerinə yetirilmir. Mən atəşkəs rejiminə, beynəlxalq hüququ və Azərbaycanın ərazi bütövlüyünü dəstəkləyən, eləcə də Ermənistan silahlı qüvvələri tərəfindən işğal edilmiş ərazilərdən erməni qoşunlarının çıxarılmasını tələb edən BMT-nin 1993-cü ildə qəbul etdiyi dörd qətnaməsinə hörmət edilməsinə çağırıram. Beynəlxalq ictimaiyyət vəziyyətin yeni bir müharibə ocağına çevrilməməsi üçün ən qısa zamanda müdaxilə etməlidir və məsələnin həlli danışıqlar masasına qaytarılmalıdır”, - o əlavə edib.