Vətən müharibəsi şəhidlərinin adına inşa edilən bulağın açılışı olub

Kürdəmirdə Vətən müharibəsi şəhidləri - İmamverdiyev Elnur Vəfadar oğlu, Əliyev Ziyadxan İbrahim oğlunun və Eyvazov Əbdülhəsən Balaş oğlunun adına inşa edilən bulağın açılışı olub.

”Report”un Yuxarı Şirvan bürosu xəbər verir ki, bulaq rayonun Quşlar kənd ümumi orta məktəbin rəhbərliyinin təşəbbüsü və təşkilatçılığı ilə həmin məktəbin qarşısında inşa olunub.

Bulağın açılış mərasimindən əvvəl şəhidlərin məzarları ziyarət olunub, ruhlarına dualar oxunub və ehsan süfrələri açıldı.

Daha sonra mərasim kənd məktəbinin qarşısında davam etdirilib. Tədbirdə rayon ictimaiyyətinin nümayəndələri, şəhid ailələri, məktəblilər və qazilər çıxış edərək şəhidlərin necə mərd, cəsur elə-obaya bağlı oğullar olduqlarını qeyd ediblər. Tədbirdə məktəblilərin ifasında vətənpərvərlik mövzusunda şeirlər və müxtəlif kompozisiyalar ifa olunub.

Şəhid Elnur Vəfadar oğlu İmamverdiyev 2001-ci ildə Kürdəmirin Carlı kəndində doğulub, burada da boya-başa çatıb. Orta məktəbi bitirdikdən sonra 2019-cu ildə xüsusi təyinatlı “N” saylı hərbi hissədə müddətli həqiqi hərbi xidmətə yollanıb.

Vətən müharibəsi başlayanda E.İmamverdiyev Füzuli, Cəbrayıl, Qubadlı və Zəngilan istiqamətlərində gedən ağır döyüşlərdə iştirak edib. Torpaqlarımızın işğaldan azad olunmasında, düşmənin canlı qüvvəsi və texnikasının məhv edilməsində böyük şücaətlər göstərib. Ölümündən sonra E.İmamverdiyev dövlət başçısının sərəncamı ilə “Vətən uğrunda” və “Cəbrayılın azad edilməsinə görə” medalları ilə təltif olunub.

Şəhid Ziyadxan İbrahim oğlu Əliyev 1997-ci ildə Kürdəmirin Carlı kəndində anadan olub. Əslən Cəbrayıl rayonundan olan Ziyadxanın ailəsi 1993-cü ildə Cəbrayıl mənfur düşmənlərimiz tərəfindən işğal olunduqdan sonra Kürdəmirə üz tutmuş və burda məskunlaşmışdılar. Ziyadxan orta məktəbi 9-cu sinifə qədər Carlı kənd orta məktəbində X-XI-ci sinifi isə Sumqayıt şəhərində fəaliyyət göstərən Qubadlı rayon Fərzən kənd orta məktəbində oxumuşdur.

2014-cü ildə o orta təhsilini başa vurduqdan sonra Azərbaycan Texniki Universitetinə daxil olmuşdur. Ziyadxan 2018-ci ildə Universiteti bitirdikdən sonra 2019-cu ilin oktyabrında hərbi xidmətə yollanıb.

Hərbi tibb kursunda 3 ay təhsil alan Ziyadxan ordudan tərxis olmasına 5 gün qalmış Vətən müharibəsi başlayıb. Ziyadxan cəbhənin Suqovuşan istiqamətində döyüşlərdə iştirak edib və səhra tibb məntəqəsinin heyətində yaralı əsgərlərimizin həyatını xilas edib. Oktyabr ayının 1-də Ziyadxan yaralı əsgərlərimizi xilas edərkən Suqovuşanda şəhid olub.

Onun nəşi Kürdəmirə gətirilib və Şəhidlər xiyabanında dəfn olunub. Ölümündən sonra Ziyadxan Əliyev Ali Baş Komandan, Prezident İlham Əliyevin müvafiq sərəncamları ilə “Vətən uğrunda”, ”Suqovuşanın azad edilməsinə görə” və “Cəsur döyüşçü” medalları ilə təltif olunub.

Şəhid Əbdülhəsən Balaş oğlu Eyvazov 1996-cı ildə Kürdəmirin Mollakənd kəndində anadan olub. Əbdülhəsən 9 aylıq olarkən ailəsi Bakıya köçür. 2003-cü ildə o, Xətai rayonundakı 165 saylı məktəbin 1-ci sinifinə gedir. Orta təhsilini başa vurduqdan sonra 2014-cü ilin oktyabrında hərbi xidmətə yollanıb.

Ə.Eyvazov 2016-cı ildə Aprel döyüşlərində qəhrəmanlıqla döyüşmüş və fəxri fərmanla təltif olunmuşdu.

21 sentyabr 2020-ci ildə ölkədə qismən hərbi səfərbərlik elan olunanda o da səfərbər olunmuş və hərbi təlimlərdə iştirak etmişdir.

Sentyabr ayının 27-də başlayan və 44 günlük davam edən Vətən müharibəsində fəal iştirak edən Əbülhəsən Füzuli rayonu uğrunda gedən döyüşlərdə cəsarətlə iştirak edərək qəhrəmancasına şəhid olub.

Əbülhəsən 30 oktyabr 2020-ci ildə Suraxanı rayonunda Şəhidlər xiyabanında dəfn olunub. Ölümündən sonra Əbülhəsən Balaş oğlu Eyvazov ölkə başçısının sərəncamı ilə “Vətən uğrunda” və ”Cəbrayılın azad olunmasına görə” medalları ilə təltif olunub.

Allah rəhmət eləsin!