Ermənistanın Səhiyyə Nazirliyi: 149 koronavirus xəstəsinə yer yoxdur

Hazırda koronavirusa yoluxmuş 149 vətəndaş xəstəxanaya yerləşdirmək növbəsini gözləyirlər.

“Report” xəbər verir ki, bu barədə Ermənistanın səhiyyə nazirinin müavini Qevorq Simonyan özünün feysbukdakı səhifəsində yazıb.

"Səhiyyə Nazirliyi COVID-19 mərkəzlərin sayını və çarpayı fondunu artırmaq üçün mümkün olan hər şeyi edir. Əgər epidemioloji vəziyyətdə müsbət sıçrayış olmasa, bir neçə gün ərzində çarpayı yerlərinin sayında maksimuma nail olacağıq", - nazir müavini yazıb.

Qeyd edək ki, ölkədə son gündə koronavirusa 424 yeni yoluxma qeydə alınıb. Pandemiya ərzində Ermənistanda COVID-19-a ümumilikdə 190 741 yoluxma aşkarlanıb, virusa yoluxmuş 172 096 nəfər sağalıb. Hazırda 14 287 nəfər aktiv koronavirus xəstəsi müalicə olunur, 3 476 pasiyent (son gün ərzində 12 ölüm) ölüb.