Pezeşkian dövlət büdcəsi layihəsinin əsas prinsip və prioritetlərini açıqlayıb

İran hökuməti dövlət büdcəsi layihəsini hazırlayarkən dörd prinsip və prioritetə əsaslanıb.

“Report” İRNA-ya istinadən xəbər verir ki, bu barədə İran Prezidenti Məsud Pezeşkian parlamentdə gələn il üçün (İran təqvimi ilə 1404-cü il üçün - 2025-ci ilin mart – 2026-cı ilin mart ayınadək olan müddət) dövlət büdcəsi layihəsini təqdim edərkən bildirib.

Məlumata görə, prezidentin açıqladığı prioritetlər aşağıdakılardır:

- Müdafiə bazasının gücləndirilməsi. Regionun şərtləri və İran xalqının üzləşdiyi təhlükələr nəzərə alınaraq büdcə rəqəmlərində müdafiə bazasının gücləndirilməsinin hökumətin əsas prioritetlərindən biri olması təmin edilib;

- Yeddinci beşillik planın tapşırıqlarının yerinə yetirilməsi: Büdcə müddəalarının yeddinci planın tapşırıqlarına uyğunluğu həmişə nəzərə alınıb;

- Sosial ədalətin gücləndirilməsi. Məqsəd əhalinin imkansız təbəqəsini dəstəkləməkdir. Proqramın büdcəsinin ədalətə əsaslanaraq tənzimlənməsi digər vəzifələrdən üstündür.

- İqtisadi artıma və inflyasiyanın azaldılmasına ciddi diqqət. Bu, yeddinci planın ali məqsədi kimi proqramın başlıca məqsədidir.