Türkiyənin 24 əyalətində tətil elan olunub

Türkiyənin 24 əyalətində güclü qar yağması səbəbindən məktəblər, liseylər, təlim kursları, xüsusi təhsil müəssisələri və reabilitasiya mərkəzlərində tədris birgünlük dayandırılıb.

“Report” xəbər verir ki, məlumatı “TRT Haber” yayıb.

Bildirilib ki, səbəb kimi güclü qar yağması ilə yarana biləcək çovğun, buzlanma, şaxta və duman təhlükəsi əsas gətirilib.

Məlumata görə, Kayseri, Neşehir, Ordu, Gümüşhane, Kastamonu, Bolu, Yozqat, Artvin, Karabük, Malatya, Giresun, Sinop, Ərzurum, Tokat, Aksaray, Kırşehir, Kahramanmaraş, Samsun, Trabzon, Niğde, Bingöl, Çankırı, Konya, Karaman əyalətlərinin bir çox rayonlarında sərt hava şəraiti ilə əlaqədar tətil elan olunub.