Azərbaycanda istehsal olunan dərmanlar barədə təqdim edilən məlumatların dairəsi müəyyənləşib

Azərbaycanda istehsal olunan dərman vasitələrinin istehsalçıları tərəfindən təqdim edilən məlumatların dairəsi müəyyənləşib.

"Report" xəbər verir ki, bununla bağlı Baş nazir Əli Əsədov qərar imzalayıb.

Qərara əsasən, Azərbaycanda istehsal olunan dərman vasitələrinin istehsalçıları tərəfindən təqdim edilən məlumatların dairəsi aşağıdakı kimi müəyyən edilir:

- dərman vasitəsinin latın qrafikasında əmtəə nişanı adı;
- dərman vasitəsinin ingilis dilində beynəlxalq patentləşdirilməmiş adı;
- dərman vasitəsinin təsiredici maddəsinin dozası;
- dərman vasitəsinin farmasevtik forması;
- dərman vasitəsinin ticarət qablaşdırılması;
- dərman vasitəsinin qablaşdırılma miqdarı;
- dərman vasitəsinin orijinal və ya generik olması;
- dərman vasitəsinin reseptlə və ya reseptsiz buraxılması;
- dərman vasitəsinin qlobal identifikasiya nömrəsi (olduğu halda);
- dərman vasitəsinin dövlət reyestrinə daxil edildiyi tarix və reyestr nömrəsi (olduğu halda);
- dərman vasitəsinin istehsal həcmi;
- dərman vasitəsinin yararlılıq müddəti;
- dərman vasitəsinin istehsalçısının hüquqi şəxslərin dövlət reyestrindəki adı;
- dərman vasitəsinin istehsalçısının VÖEN-i.

Azərbaycanda istehsal olunan dərman maddələrinin istehsalçıları tərəfindən təqdim edilən məlumatların isə dairəsi aşağıdakı kimi müəyyən edilir:

- dərman maddəsinin beynəlxalq patentləşdirilməmiş adı;
- dərman maddəsinin qablaşdırılması;
- dərman maddəsinin yararlılıq müddəti;
- dərman maddəsinin istehsal həcmi;
- dərman maddəsinin istehsalçısının hüquqi şəxslərin dövlət reyestrindəki adı;
- dərman maddəsinin istehsalçısının VÖEN-i.

Qərara əsasən, həmçinin Azərbaycanda istehsal olunan tibb vasitələrinin istehsalçıları tərəfindən təqdim edilən məlumatların dairəsi aşağıdakı kimi müəyyən edilir:

- tibb vasitəsinin əmtəə nişanının adı;
- tibb vasitəsinin risk dərəcəsi;
- tibb vasitəsinin növü və qablaşdırılması;
- tibb vasitəsinin istifadə forması;
- tibb vasitəsinin tərkibində dərman vasitəsi olduqda bu dərman vasitəsinin təsiredici maddəsi və dozası barədə məlumatlar;
- tibb vasitəsinin yararlılıq müddəti;
- tibb vasitəsinin istehsal həcmi;
- tibb vasitəsinin istehsalçısının hüquqi şəxslərin dövlət reyestrindəki adı;
- tibb vasitəsinin istehsalçısının VÖEN-i.