Azərbaycan Demokratik Respublikasının tarixi Çin mətbuatında

Çinin Pekin Xarici Dillər Universitetinin Asiya-Afrika fakültəsinin Azərbaycan dili kafedrasının müdiri Aqşin Əliyevin təşəbbüsü ilə bu ölkənin “Mp.weixin.qq.com” saytında 28 may – Respublika Gününə həsr olunmuş "Əzab və Şöhrət: Azərbaycan Demokratik Respublikasının tarixi" sərlövhəli məqalə yayımlanıb.

Diasporla İş üzrə Dövlət Komitəsindən “Report”a verilən məlumata görə, Pekin Universitetinin nəzdindəki Asiya Kollecinin Azərbaycan dili fakültəsinin tələbəsi Lu Sinin qələmə aldığı məqalədə ölkəmizin dövlətçilik tarixində baş vermiş mühüm hadisəni şərtləndirən ictimai-siyasi proseslər, cümhuriyyət qurucuları, Azərbaycan Demokratik Respublikasının (ADR) yaranması, fəaliyyəti, həyata keçirdiyi siyasi-iqtisadi və humanitar islahatlar, əldə etdiyi nailiyyətlər və süqutu barədə müfəssəl məlumat verilib.