Çilinin müvəqqəti işlər vəkili: "Azərbaycanla əməkdaşlığa hazırıq"

"Çili Azərbaycanla əməkdaşlıq üçün açıqdır".

“Report” xəbər verir ki, bunu Çilinin Azərbaycandakı müvəqqəti işlər vəkili Fidel Koloma Beynəlxalq Münasibətlərin Təhlili Mərkəzində “Sakit okean: Azərbaycan və Latın Amerikası ölkələri arasında əlaqələndirici halqa rolu oynayan Sakit okean alyansı” mövzusunda keçirilən "dəyirmi masa"da bildirib.

Diplomat deyib ki, Pasifik Alyans üzv ölkələr arasında iqtisadi əməkdaşlığı inkişaf etdirmək məqsədini daşıyır.

“Biz Azərbaycanda olmağa çox şadıq, çünki Azərbaycan Cənubi Qafqazda Alyansın bütün üzv ölkələrinin təmsil olunduğu yeganə ölkədir”, - o vurğulayıb.

Xatırladaq ki, ticarət bloku olan Sakit okean alyansına 4 Latın Amerikası ölkəsi – Meksika, Peru, Çili və Kolumbiya daxildir. Azərbaycan təşkilatda müşahidəçi qismində təmsil olunur.

Ötən ilin dekabr ayında Sakit okean alyansının Bakıda ofisi açılıb.