Ekspert: “Pakistan və Azərbaycan ikitərəfli əməkdaşlığı dərinləşdirməyə çalışır”

"Pakistan və Azərbaycan müxtəlif sahələrdə ikitərəfli əməkdaşlığı dərinləşdirməyə çalışır".

Bunu "Report"a açıqlamasında pakistanlı ekspert, Pakistan-Azərbaycan Məzunlar Assosiasiyasının təsisçisi Kayser Nəvab deyib.

"Ölkələrimiz arasında dostluq və əməkdaşlıq əlaqələrinin uzun tarixi, eyni zamanda ortaq mədəni, dil və dini əlaqələr var. Son illər hər iki ölkə müxtəlif sahələrdə, o cümlədən müdafiə, enerji, ticarət və investisiya sahələrində ikitərəfli əməkdaşlığın dərinləşdirilməsi imkanlarını araşdırır”, - o bildirib.

Ekspert vurğulayıb ki, Pakistan və Azərbaycan artıq müdafiə sahəsində əməkdaşlıq edir, birgə hərbi təlimlər keçirir.

“İqtisadi əməkdaşlığın genişləndirilməsi üçün ölkələr arasında ticarət və investisiya sahəsində bir sıra sazişlər və anlaşma memorandumları imzalanıb”, - K.Nəvab əlavə edib.

Ekspertin sözlərinə görə, qarşılıqlı faydalı tərəfdaşlıq üçün ən böyük potensiala malik olan sektorlar enerji, infrastruktur, kənd təsərrüfatı, qida sənayesi, informasiya texnologiyaları, səhiyyə və elm sahələridir.

K.Nəvab qeyd edib ki, Azərbaycan regionun ən böyük neft və qaz istehsalçılarından biridir, Pakistanın isə enerjiyə artan tələbatı var ki, bu da onu Azərbaycanın enerji şirkətlərindən enerji təchizatı üçün cəlbedici bazara çevirir.

İnformasiya texnologiyaları sahəsində əməkdaşlıq potensialını şərh edən ekspert deyib: "Azərbaycanda informasiya texnologiyaları sektoru sürətlə inkişaf edir. Pakistan isə sürətlə inkişaf edən informasiya texnologiyaları mərkəzidir. Hər iki ölkə bu sahədə daha sıx əməkdaşlıqdan yararlana bilər”.

Nəvabın sözlərinə görə, Azərbaycanda kənd təsərrüfatı məhsullarının istehsalı və emalı yaxşı inkişaf edib.

“Bir sözlə, Pakistan və Azərbaycan əməkdaşlığın inkişafı üçün müsbət perspektivlərə malikdir. İmzalanmış sazişləri və anlaşma memorandumları icra etməklə bunu uğurla həyata keçirmək olar”, - Kayser Nəvab fikrini tamamlayıb.