Səfir: “Yüz minlərlə azərbaycanlı doğma şəhərlərinə qayıdacaq”

Böyük Britaniyanın Azərbaycandakı səfiri Ceyms Şarp azərbaycanlıları qarşıdan gələn Yeni il və Dünya Azərbaycanlılarının Həmrəyliyi Günü münasibətilə təbrik edib.

“Report” xəbər verir ki, səfir bir çoxumuz üçün bəlkə də ən çətin illərdən birini yola saldığımızı, koronavirus pandemiyasının gündəlik həyatımıza maska taxmaq, sosial məsafə saxlamaq və əllərimizi hər fürsətdə yumaq kimi yeni normalar gətirdiyini bildirib.

“Ənənəvi olaraq, bu gün dostlar və ailələri Yeni ili qeyd etmək üçün bir araya gələcəklər. Təəssüf ki, bir çoxları üçün bu, mümkün olmayacaq və bu dəhşətli virus səbəbindən il ərzində dünyasını dəyişənlərin xatirəsini anmaq istərdim. Xarici, Birlik və İnkişaf Nazirliyi adından Dağlıq Qarabağ və ətrafında gedən son döyüşlərdə həlak olanlara görə də dərin hüznlə başsağlığı vermək istərdim. Bu çətin anda bütün münaqişə qurbanlarının dostlarına və ailələrinə səbr diləyirik”.

Səfir bu ilin xüsusilə çətin anlarda bir-birimizə dəstək olmağın vacibliyini və dəyərini göstərdiyini vurğulayıb: “Böyük Britaniya səhiyyə işçilərinin bacarıqlarının inkişaf etdirilməsinə və regionlarda səhiyyə xidmətlərinin gücləndirilməsinə kömək etmək üçün apardığımız iş vasitəsilə Azərbaycana COVID-19 ilə mübarizədə dəstək olmaqdan qürur duyur”.

Böyük Britaniya həmçinin Dağlıq Qarabağ münaqişəsindən ən çox təsirlənənlər üçün Beynəlxalq Qırmızı Xaç Komitəsinə 1 milyon funt sterlinq yardım ayıraraq ehtiyacı olan azərbaycanlıları da dəstəkləyib.

“COVID-19 qlobal iqtisadiyyatın böyük bir hissəsini dayandırdı və bütün ölkələr üçün ağır nəticələrə səbəb oldu. Lakin sağaldıqca təbiəti qoruyan və bərpa edən, ölümcül viruslar və iqlim təsirlərinə məruz qalmağımızı azaldan daha təmiz iqtisadiyyat yaratmaq fürsətimiz var. BMT-nin İqlim Dəyişikliyi Konfransına ev sahibliyi edən Böyük Britaniya iqlim ambisiyasını artırmaqdadır. Azərbaycanın strateji enerji tərəfdaşı olan Böyük Britaniya və şirkətlərimiz əməkdaşlığımızı genişləndirməyə və Azərbaycanın yaşıl enerji mənbələri istiqamətində enerji sahəsinin şaxələndirilməsini dəstəkləmək istəyir”, - C.Şarp söyləyib.

Səfir yüz minlərlə azərbaycanlı məcburi köçkünün təxminən otuz ildən sonra tezliklə doğma şəhər və kəndlərinə qayıdacaqlarını qeyd edib. “Bu yaşayış məntəqələri yenidən qurulduğundan qabaqcıl texnologiya və ekoloji cəhətdən təhlükəsiz ümumi yaşayış məntəqələrinin yaradılması üçün bir fürsət yaradır”, - deyə bildirən C.Şarp Böyük Britaniyanın yaxın illərdə azərbaycanlı məcburi köçkün icmalarına dəstəyini genişləndirəcəyini qeyd edib.

“2020-ci il çətinliklər ili olsa da, gəlin 2021-ci ilə fürsətlər ili – cəmiyyətimizi daha güclü və daha sağlam, iqtisadiyyatımızı yaşıllaşdırmaq və ətraf mühitimizi daha təmiz etmək imkanları verən il kimi baxaq. Bütün Azərbaycanlıları Dünya Azərbaycanlılarının Həmrəyliyi Günü münasibətilə təbrik edirəm və Britaniya icmamız da daxil olmaqla, Azərbaycanda olan hər kəsə yeni ildə can sağlığı və xoşbəxtlik arzulaylıram”, - səfir sözlərini yekunlaşdırıb.